Cre ren mee ec yn jerrey shiaghtin?

Posted on November 2, 2010

0


Cre ren mee ec yn jerrey shiaghtin? – What did I do at the weekend?

The following is work from some of my classes this week.

Jeheiney ren mee gynsaghey Gaelg ec yn Thie-tashtee ayns Doolish. Va mee ec yn thie-tashtee eddyr daa-yeig  as jees as lurg shen hie mee dys thie Vrian Stowell. Ren me loayrt rish Brian rish tammylt (for a while) as lurg shen ren mee gimman dys Tesco. Cha mie lhiam Tesco as cha mie lhiam shappal ayns Tesco agh ren mee shappal ayns Tesco er yn oyr dy row mee ayns Doolish. Honnick mee Jackie ayns Tesco as ren mee kionnaghey ram bee as jough. Lurg shen ren mee gimman dy valley as va mee erash ayns Purt le Moirrey mysh kiare. Ren mee gobbraghey rish tammylt er my cho-earrooder (Computer) as mysh queig hie mee dys yn Oik-postagh. Ren mee cur shilley er my vummig as ren mee shooyl dy valley. Cha ren mee monney Oie Jeheiney. Cha vaik mee monney er yn çhellveeish er yn oyr dy row mee skee agglagh as hie mee dy lhie mysh jeih.

Moghrey Jesarn ren mee girree mysh shiaght as mysh jeih ren mee çhellvaney er (telephone) my charrey  ta cummal ayns Rhumsaa. Cha nee Manninagh eshyn agh s’mie lesh cummal as gobbraghey ayns Rhumsaa. By vie lhiam cur shilley er ayns Shiaghtin. Mysh nane-jeig ren shin (mish, my ven as my vac) shooyl dys Purt Çhiarn. Hie shin dys yn thie-bee ‘Bohemian’ son bee. Ren mee gee awree-eeast (fish soup) as v’eh yindyssagh. Ren my vac Orry,  keck mooar! Lurg ‘Bohemian’ hie shin dys Shoprite as yn çhapp MEA as ren mee kionnaghey stoo son my vummig. Ren mee kionnaghey cuirrey (kettle) er e son. Ren shin shooyl dy valley as oie Jesarn ren mee coagyrey Curree Braddan (Salmon Curry). V’eh yindyssagh. Hie Orry dy lhie mysh hoght as ec nuy hie mee dys yn Albert son jough ny ghaa. Va kiaull yindyssagh ayn. S’mie lhiam geaishtagh rish Kiaull Manninagh agh cho noddym cloie eh. Ren mee giu Campari as ren James kionnaghey Campari elley er my hon. Ren mee loayrt Gaelg rish caarjyn as va mee maynrey dy liooar. V’eh feer vie agh va mee beggan skee as hie mee dy lieh mysh nane-jeig. Cha row mee scooyrit agh er-lhiam dy row ram sleih elley scooyrit.

Moghrey Jedoonee ren mee girree mysh queig! Cha nel Orry toiggal GMT! Ren mee jeeaghyn er bluckan coshey er iPlayer moghrey Jedoonee as mysh jeih ren shin shooyl dys Creneash. She laa braew v’ayn.  Cha row eh feayr as cha row eh ceau. Ren shin kionnaghey tiggadyn as ren shin geddyn (get) moot. Honnick shin sleih daunsey (dancing) as honnick shin Kirree Loaghtan agh cha ren mee taggloo roo. Va ram sleih ayns Creneash agh cha ren shin tannaghtyn foddey (long). Lurg Creneash ren shin shooyl sheese (down) yn Darrag as honnick shin shenn (old) thie Nigel Mansell. T’eh agglagh. Va shin erash ec my hie mysh daa-yeig as ren shin gee tooilley (more) Curree Braddan. Va mee skee agglagh fastyr Jedoonee er yn oyr dy ren mee girree ec queig! Honnick mee yn Simpsons as ren mee cadley beggan as lurg shen hie mee son shooyl marish Orry. Ren Orry cadley…bwooise da Jee (Thank God). Va mee erash ec my hie mysh kiare as ren mee gobbraghey beggan as ec queig ren mee coagyrey pieyn Linda McCartney lesh praasyn as lossreeyn (potatoes and vegetables).  V’eh mie dy liooar agh cha row eh cho mie as (as good as) Curree Braddan.

Oie Jeheiney cha ren mee monney. Ren mee surfal beggan er yn Eddyr-voggyl (Internet) agh cha ren mee jeeaghyn er Mad Men er yn iPLayer. S’mie lhiam Madmen as er-lhiam dy vel eh ny share na claare erbee elley (it’s better than any other programme). Shegin dou (I have to) jeeaghyn er  dy gerrid. Ren paitçhyn çheet dys my hie Oie Jedoonee as ren ad goaill arrane carryn (tunes) Hop tu Naa. V’ad feer vie as ren mee cur miljyn daue (I gave them sweets). Ren mee lhiah liooar ayns Gaelg oie Jedoonee rish tammylt. Screeu Chris Lewin yn Lioar as t’eh yindyssagh. Ansherbee, hie mee dy lhie mysh jeih er yn oyr dy row mee skee agglagh as ren mee cadley gollrish babban.

Feyshtyn – questions

Cre’n traa ren mee gynsaghey Gaelg Jeheiney?

Cre’n fa ren mee shappal ayns Tesco?

Craad hie mee ec queig Jeheiney?

Vaik mee monney er yn çhellveeish oie Jeheiney?

Cre’n traa ren mee girree moghrey Jesarn?

Craad hie shin son bee Jesarn as cre ren mee gee?

Cre ren Orry?

Cre ren mee kionnaghey son my vummig ayns Purt Çhiarn?

Row yn Curree Braddan braew?

Noddym cloie kiaull Manninagh?

Quoi ren kionnaghey Camapri er my hon?

Vel Orry toiggal GMT?

Row yn emshyr braew ayns Creneash?

Cre honnick shin er yn Darrag?

Cre ren mee coagyrey Oie Jedoonee?

Vaik mee Madmen?

Ren paitçhyn çheet dys my hie Oie Jesarn?

Quoi screeu yn lioar lhiah mee oie Jedoonee?

Row mee skee agglagh?

Listen to the story here: cre ren mee?

Tagged: ,
Posted in: lessoonyn